बैतडी,
दशरथचन्द नगरपालिका वडा न. ८बैतडीकी एक ८बर्षीय बालिका १५असारमा बलत्कृत भइन् ।
स्थानिय दाजु पर्ने १५ बर्षका किसोरले उनलाई जंगलमा लगेर जवरजस्ती करणी गरेका थिए । पीडक किशोर अझै फरार रहेका छन् ।
बेहोस अवस्थामा बालिकाकी आमाले फेला पारेकी उनलाई १ हप्ता जिल्ला अस्पतालमा राखियो । त्यसपछि २० दिन घरमै बसेकी उनको स्वास्थ्य अवस्था बिग्रदै गएपछि ११ साउनमा पुनः अस्पतालमा ल्याइयो । यस पटक भने उनलाई ४ दिन अस्पताल भर्ना गरिएपनि उपचार हुन सकेको छैन् । अहिले बालिका हिड्न नसक्ने भएकाले बोकेर लैजानु पर्छ ।
पीडित बालिकाकी आमाले भनिन्,‘छोरीको थप उपचारका लागि धनगढी लग्नुपर्ने भएको छ । हामी संग पैसा छैन् । कतैबाट सहयोग हुन्छ की भन्दै नगरपालिकामा पनि गयौँ । केहि सहयोग पाइएको छैन् ।’ प्रहरीमा उजुरी गरे पनि बलात्कारमा संलग्न अहिले सम्म पक्राउ नपरेको जानकारी दिएन् । अहिले उल्टै पीडक व्यक्तिको परिवार र गाउँलेले समेत उल्टै धम्की दिन थालेको उनको आमाको भनाई छ ।
पीडित बालिकाका बुवा अपांग छन् । उनि जन्मजात आखा देख्दैनन् । कसैलाई देखेमा ठम्याउन सकेपनि आखाँको उपचार हुन सकेको छैन् । ३सन्तानकी आमा रहेकी पीडित बालिकाकी आमाले मजदुरी गर्दै हुर्काएकी छोरी नै बलत्कृत भएपछि अहिले उक्त परिवारलाई ठुलो आर्थिक समस्या परेको छ ।
यसरी भयो घटना
बालिकाकी आमा खेतमा मकै गोड्न गएकी थिइन् । आमालाई घर बोलाउन गएकी बालिका चिउरी खान गइन् । त्यसै बेला कतैबाट आएका किसोरले उनलाई तानेर झाडीमा लगेर करणी गरे ।
५ बर्षिय गाउँले बालकले छोरीलाई कसैले पिटिरहेको भन्दै खबर गरेपछि २ घण्टापछि घटनास्थलमा पुगेकी आमाले छोरीलाई बेहोस अवस्थामा भेटिन् ।
बलात्कारमा संलग्न किशोर आफन्त नै भएकाले ,‘हामी गाउँ घरमै कुरा मिलाउथ्यौँ । किन प्रहरीमा रिपोर्ट गरेको ?’ भन्दै धम्की दिने गरेका छन् । पीडक किशोर अझै फेला नपरेकाले खोजी कार्य जारी रहेको जिल्ला प्रहरी कार्यालय बैतडीका प्रहरी निरिक्षक लोकराज जोशीले बताए ।
