बैतडी
वर्तमान समयमा सहजै फोन र इन्टरनेटको प्रायः सबै ठाउँमा पहुँच हुन्छ । बैतडीमा अधिकांश दुर्गम ठाउँहरुमा समेत अहिले सहजै टेलिफोन र मोबाइलबाटै इन्टरनेट चल्दछ । तर जिल्लाको पुर्चौडी नगरपालिकाको केन्द्र हाटमा भने, अझै पनि टेलिफोन र इन्टरनेट सेवा सहज हुन सकेको छैन् ।
अन्य बजारहरुको तुलनामा निकै विकसीत हाट बजार फोन र इन्टरनेट सेवाको असहजताका कारण दुर्गम जस्तो भएको छ ।
फोन र इन्टरनेट सेवा सहज रुपले नचल्दा कार्यालयका कामकाज गर्न सकस भएको पुर्चौडी नगरपालिका स्वास्थ्य शाखा प्रमुख विनोद कुमार कुवरले बताए । उनले भने, ‘सिखर कम्पनीको इन्टरनेट जडान गरिएको छ । यो बेला बेलामा बिग्रिरहन्छ । बिग्रेको कयौदिन सम्म पनि मर्मत गरिदैँन् । गुनासो गर्न कम्पनीको सम्पर्क व्यक्तिलाई फोन गर्दा कहिलेकाँही मात्रै रेस्पोन्स हुन्छ ।’
मोबाइलबाट हटस्पट खोलेर कामकाज चलाउने गरेको उनले बताए । कुवरले भने,‘झ्यालमा, रुखमा वा घरको छतमा मोबाइल राखेर हटस्पटका माध्यमबाट काम चलाउने गर्दछौँ । त्यसरी समेत कुनैबेला मात्रै काम हुन्छ ।’
इन्टरनेटको समस्याका कारण नगरपालिकालाई आर्थिक कारोबार, पञ्जीकरणको काम गर्न समस्या हुने गरेको प्रमुख प्रशासकीय अधिकृत बीर बहादुर नेपालीले बताए । उनले भने,‘यसपालि पहिल्यै भुक्तानीका अधिकांश कामहरु सकेकाले सजिलो भयो । जसोतसो काम त सम्पन्न गर्यौँ तर केहि सेवाग्राहिले इन्टरनेटको समस्यामा कारण झण्जट खेप्नुपर्यो ।’
पुर्चौडी हाट बजार २सय बढी पसल तथा होटल भएको व्यवस्थीत बजार हो । यहाँ अन्य ठाउँको तुलनामा कारोबार समेत बढी हुन्छ । यहाँ नगरपालिका कार्यालयका साथै बहुमुखि क्याम्पस, स्कूलहरु, बैंक तथा वित्तिय संस्था, इलाका प्रहरी कार्यालय र दर्जनौँ सरकारी र गैर सरकारी कार्यालयको कामकाज इन्टरनेटका कारण प्रभावीत हुने गरेको छ । गतबर्ष इन्टरनेटको समस्याका कारण पुर्चौडीमा २हजार बढी सेवा ग्राहिले बैंकमा योजनाका खाता समेत खोल्न पाएका थिएनन् ।
हाट बजारका लागि सोलार पावरबाट टेलिकमको टावर सञ्चालन गरिएकाले समस्या हुने गरेको नेपाल टेलिकम शाखा कार्यालय बैतडीका कार्यालय प्रमुख बिक्रम राम टमटाले बताए । उनले भने,‘विद्युत नभएका सोलार जडित ठाउँहरुमा सञ्चालीत टावरमा मौसमको खराबीका बेला यस्ता समस्याहरु आउने गरेका छन् ।’
पुर्चौडीको कुवाकोटमा सञ्चालीत टावरमा विद्युतको मागका लागि प्रादेशीक कार्यालय मार्फत स्टीमेट पठाएर सरकार समक्ष विद्युतको माग गरेको उनले बताए ।
