बैतडी,
बैतडीका एक युवक मलेसियाबाट बेपत्ता भएका छन् । रोजगारीका लागि मलेसियामा रहेका मेलौली नगरपालिका ८ कोटिगाउँका २८ वर्षीया मिनसिंह ठगुन्ना बेपत्ता भएका हुन् ।
मलेसियाको रमाटेक्स कम्पनीमा कार्यरत ठगुन्ना फागुन १३ गतेदेखी सम्पर्कविहिन भएका बुवा बहादुरसिंह ठगुन्नाले जानकारी दिए । १२ गते रातीसम्म फोन सम्पर्क भएको र १३ गतेदेखि सम्पर्क हुन नसकेको उनले बताए ।
उनी १० वर्षअघि रोजगारीका लागि मलेसिया गएका थिए । कोठामै काम गर्ने क्रममा टाउकोमा गम्भिर चोट लागेको थियो । त्यसको ४÷५ दिनपछि उनी बेपत्ता भएका हुन् ।
टाउकोमा चोट लागेपछि मानसिक अवस्था कमजोर भएका ठगुन्ना एक्कासी कोठाबाट भागेको उनिसँगै कोठामा बस्दै आएका अर्का नेपालीले जानकारी गराएको बहादुर सिंह ठगुन्नाले बताए ।
“उनको टाउकोमा चोट लागेको दुईतीनदिनपछि एक्कासी बरबराउने, डराउने लगायतका लक्षण देखाउने गरेका थिए, १३ गतेराती नै उनि मोवाइल कोठामा छोडेर भागेका रहेछन्, आजसम्म भेटिएनन् ।” उनले भने ।
उक्त कम्पनीले पनि बेपत्ता भएका ठगुन्ना यस कम्पनीको सम्पर्कमा नरहेको जानकारी त्यहाको प्रहरीलाई गराएको र उनको कोठा समेत खाली गरिदिएको बहादुरसिंहले गुनासो पोखे ।
परराष्ट्र मन्त्रालयलाई खोजीका लागि आवश्यक पहल गरि दिन आग्रहसहित सिफारिस गरिएको मेलौली नगरपालिका वडा नम्बर ८ का वडाअध्यक्ष तपेन्द्र सिंह बिष्टले जानकारी दिनुभयो ।
उद्योग बाणिज्य तथा आपूर्ती मन्त्रालयमा समेत परराष्ट्रसँग आवश्यक समन्वय गरी खोजि गरिदिन आग्रह गरिएको वडा अध्यक्ष बिष्टले बताए ।
