बैतडी,
बैतडीको पाटन नगरपालिका–१ स्थित सिद्धेस्वर मावि मेल्चौराको वार्षिकोत्सव कार्यक्रम सम्पन्न भएको छ । सुदूरपश्चिम प्रदेशका भौतिक पुर्वाधार विकास मन्त्री सुरेन्द्र पालको प्रमुख आतिथ्यतामा ७०औँ वार्षिकोत्सव कार्यक्रम सम्पन्न भएको हो ।
विद्यालयको वार्षिकोत्सव कार्यक्रमलाई सम्बोधन गर्दै मन्त्री पालले विद्यालयको सर्वाङ्गिण विकासको लागि सक्दो पहल गर्ने बताएका छन् । सडक पुर्वाधारको क्षेत्रमा पालिकासँग समन्वय गरि योजना कार्यान्वयन भइरहेको बताउदै मन्त्री पालले विद्यालयको घेर पर्खाल निर्माण लगायतका भौतिक संरचना निर्माणको लागि प्रदेश सरकारबाट आवश्यक पहल गर्ने बताएका हुन् ।
‘मलाई यस विद्यालयका व्यवस्थापन समितिका अध्यक्षबाट पनि भौतिक निर्माणको विषयमा मागपत्र आएको छ, यस विद्यालयको घेर पर्खाल निर्माणसँगैका अन्य भौतिक विकासका लागि पहल गर्न छु,’ मन्त्री पालले भने ।
मन्त्री पालले स्थानीय सरकारसँग आवश्यक समन्वय गरेर यहाँको विकास गर्नको लागि भौतिक पुर्वाधार विकास मन्त्रालय तयार रहेको अवगत गराए ।
विद्यालयको वार्षिकोत्सव कार्यक्रमका विशिष्ट अतिथि पाटन नगरपालिकाका नगर प्रमुख गौरी सिंह रावलले शैक्षिक गुणस्तर सुधारको लागि पाटन नगरपालिकाले आवश्यक कार्यक्रम ल्याउने बताए ।
कार्यक्रमका विशिष्ट अतिथि वडा नं १ का वडा अध्यक्ष तर्क सिंह ठगुन्नाले प्रदेश सरकारले पाटन नगरपालिकासँग समन्वय गरि सहलगानीमा भौतिक निर्माण गर्नुपर्नेमा जोड दिए ।
कार्यक्रमका विशिष्ट अतिथि नेकपा एमालेका जिल्ला कमिटि उपाध्यक्ष लोकेन्द्र भण्डारीले पाटन नगरपालिकाले विद्यालय सामायोजनका नाममा विद्यार्थीहरुलाई दुःखदिनेगरी समायोजन गर्न नहुने बताए । भौगोलिक विकटतालाई पनि ध्यान दिएर विद्यालय समायोजनको बाटोमा जानु पर्ने बताए ।
विद्यालयको वार्षिक गतिविधिको जानकारी, शैक्षिक तथा अतिरिक्त कार्यक्रमको जानकारीसहितका सांस्कृतिक कार्यक्रमको आयोजना गर्दै विद्यालयले वार्षिकोत्सव कार्यक्रम सम्पन्न गरिएको विद्यालयका प्रद्यानाध्यापक दिपेन्द्र चाँडले जानकारी दिए । उनले वार्षिकोत्सव कार्यक्रममा विद्यालयको वार्षिक शैक्षिक तथा आर्थिक प्रतिवेदन प्रस्तुत गरेका थिए ।
शैक्षिक गुणस्तर सुधारको लागि प्रविधियुक्त शिक्षामा जोड दिनु पर्ने र त्यसका लागि आर्थिक पाटो बलियो बनाउनको लागि सबै पक्ष एकजुट हुनुपर्ने प्रद्यानाध्यापक चाडले बताए । स्थानीय सरकार र प्रदेश सरकारबाट विद्यालयले शैक्षिक गुणस्तर सुधारको लागि आवश्यक सहयोग गर्नुपर्नेमा जोड दिएका थिए ।
विद्यालय व्यवस्थापन समितिका अध्यक्ष हिक्मत सिंह रावलले आफुले विव्यसको कार्यकाल समालेदेखि नै शैक्षिक गुणस्तर सुधारको लागि कार्यक्रम गरिरहेको र पालिका र प्रदेश सरकारबाट भौतिक निर्माणका कार्यमा सहयोगको अपेक्षा हेको बताए ।
शैक्षिक सुधारको लागि भरपूर प्रयास गरिहेको विद्यालय मेल्चौरा
सिद्धेस्वर मावि मेल्चौराले विद्यालयको शैक्षिक गुणस्तरको पाटो सुधारको लागि भरपूर प्रयास गरिरहेको छ । २ वर्षदेखि कक्षा १ देखि अंग्रेजी माध्यमबाटै पढाई सुरु गरिसकेको छ ।
आइसीटी ल्याब, विज्ञान प्रयोगशाला, ई हाजरी जडान, सिसी टिभी क्यामेरा जडान गरिनुका साथै प्रत्येक कक्षा कोठामा कम्प्युटरसहितको दराजको व्यवस्था गर्दै सुविधासम्पन्न कक्षा कोठा निर्माणको थालनी गरिएको विद्यालय व्यवस्थापन समितिका अध्यक्ष हिक्मत सिंह रावलले बताए ।
यसैगरी प्रत्येक महिना कक्षा टेस्ट गरिने र नतिजा सार्वजनिक गरिएको दिन प्रत्येक अभिभावकहरुलाई बोलाएर रिजल्ट डे कार्यक्रम गर्ने गरिएको पनि विव्यस अध्यक्ष रावलले बताए ।
यसैगरी शिक्षक डायरीसँगै विद्यार्थी होमवर्क डायरीको व्यवस्थापन गरिने उनले बताए ।
आफ्नो कार्यकालदेखि नै शैक्षिक गुणस्तर सुधारको लागि आधारभूत आवश्यकतासँगै अतिरिक्त कार्यक्रमको थालनी गरेको विव्यस अध्यक्ष रावलले बताए ।
यसैगरी भारतीय दुतावासँग भौतिक संरचनाको माग गर्नको लागि प्रपोजल तयार पारिन लागिएको पनि उनले बताए ।
विद्यालयका प्रद्यानाध्यापक दिपेन्द्र चाडले आफुले पाउने प्रद्यानाध्यापक भत्ताको रकम विद्यालयलाई सहयोग गरेका छन् । विद्यालयको विकासमा टेवा पुर्याउनको लागि आफुले पाउने भत्ता वाफतको रकम विद्यालयलाई नै सहयोग गरिरहेको प्रअ चाडले बताए ।
