बैतडीको गोठालापानी स्थित खाद्य प्रविधि तथा गुण नियन्त्रण डिभिजन कार्यालयमा कर्मचारीको अभाव छ । कार्यक्षेत्र बैतडी र दार्चुला रहेको खाद्य प्रविधि तथा गुण नियन्त्रण डिभिजन कार्यालयमा दरबन्दीअनुसार कर्मचारी नहुँदा कार्य सम्पादनमा समस्या भएको हो ।
एक जना कार्यालय सहयोगी गरि चार जनाको दरबन्दी भएपनि खाद्य अनुसन्धान अधिकृत र कार्यालय सहयोगी मात्रै रहेको कार्यालय प्रमुख ललित कठायतले जानकारी दिए । दुई जना सुब्बा स्तरका प्राविधिक साहयकको दरबन्दी रिक्त रहेको उनले बताए ।
बजार अनुगमन, नमूना संकलन, खाद्य उद्योगको नविकरण नयाँ सिफारीस लगायतका काम गर्दै आएकोमा दरबन्दी अनुसार कर्मचारी पदपुर्ति नहुँदा समस्या हुने गरेको कार्यालय जनाएको छ । डेढ वर्षअघि एक जना प्राविधिक साहयकको खाद्य प्रविधि तथा गुण नियन्त्रण कार्यालय धनगढीमा काज सरुवा भएको थियो ।
खाद्य अनुसन्धान अधिकृत र कार्यालय सहयोगी भरमा कार्यालय सञ्चालन हुँदै आएको छ । दरबन्दीअनुसार कर्मचारी नहुँदा बजार अनुगमनमा समस्या हुने गरेको खाद्य प्रविधि तथा गुण नियन्त्रण डिभिजन कार्यालयका प्रमुख कठायतले बताए ।
“कार्यलयलाई बैतडी र दार्चुलाको जिम्मेवारी दिइएको छ । कर्मचारी म मात्रै छु । दरबन्दी अनुसार कर्मचारी पदपुर्ती नहुँदा समस्या हुने गरेको छ ।”,प्रमुख कडायतले भने “कहिलेकाही कार्यालय बन्द नै गरेर अनुगमनमा जानुपर्ने अवस्था छ ।”
कृषि तथा पशुपन्छी विकास मन्त्रालय अन्तर्गत रहेको सो कार्यालय बैतडीमा २०७५ सालमा स्थापना भएको थियो । सो कार्यालयको आफ्नै भवन पनि छैन । अहिले सम्म भाडाकै भवनबाट कार्यालय सञ्चालनमा रहेको छ ।
