बैतडी
बैतडीको दोगडाकेदार गाउँपालिकामा १० शैय्याको आधारभूत अस्पताल भवन निर्माणको काम अन्तिम चरणमा पुगेको छ । वडा नम्बर ६को सित्तडमा भइरहेको अस्पताल निर्माणको काम अन्तिम चरणमा पुगेको दोगडाकेदार गाउँपालिकाका स्वास्थ्य शाखा प्रमुख नरेन्द्र नाथले बताउनुभयो। भौतिक निर्माणको ९० प्रतिशत पुरा भएको उनले बताए ।
आगामी बैशाख अन्तिम साता पालिकालाई हस्तान्त्रणको तयारी भइरहेको छ ।
स्वास्थ्य र जनसंख्या मन्त्रालयबाट १० शय्याको अस्पताल निर्माणको लागि आवश्यक बजेट र कार्यक्रम प्राप्त भए अनुसार २०७८ सालको जेठ ३मा अस्पताल निर्माणको ठेक्का सम्झौता भएको थियो । अब यो कार्य अन्तिम चरणमा पुगेको छ । यस वर्षको अन्तिमसम्म यसलाई पूर्ण रूपमा सम्पन्न गर्ने लक्ष्य राखिएको स्वास्थ्य शाखा प्रमुख नाथले बताउनुभयो ।
अस्पताल निर्माणको कुल लागत अनुमानित रु १४ करोड ६८ लाख २९ हजार ६ सय ६५ रहेको र ठेक्का सम्झौतामा ८ करोड ५१ लाख ४६ हजार ७ सय ३० रुपैयाँ तोकिएको थियो । हालसम्म ७ करोड ८८ लाख ७२ हजार ५ सय १७ रकम निकासा भइसकेको छ भने ७ करोड ५१ लाख ९२ हजार ६ सय १७ खर्च गरिएको छ । २ करोड २२ लाख ४८ हजार ९ सय ६८ रकमको अतिरिक्त माग गरिएको छ ।
यसका साथै, दोगडाकेदार अस्पतालका लागि अत्याधुनिक स्वास्थ्य उपकरणहरूको माग गरिएको छ । अस्पतालको संचालन र सुविधाका लागि डिजिटल एक्स–रे मेसिन (५०० एम ए), युएसजी। मेसिन (कलर डोप्टर), सी।बी।सी। मेसिन, एनालाइजर, र माइक्रोस्कोप (सी एक्स ३३ कोलम्पस) जस्ता अत्यावश्यक उपकरणहरूको सूची तयार गरेर स्वास्थ्य सेवा विभागलाई पत्राचार गरिएको छ ।
स्वास्थ्य सेवा पहिलो प्राथमिकतामा रहेको बताउदै दोगडाकेदार गाउँपालिका अध्यक्ष चक्र कार्कीले प्रत्येक नागरिकलाई सस्तो, सहज र गुणस्तरीय स्वास्थ्य सेवा प्रदान गर्ने लक्ष्य रहेको बताउनुभयो । उहाँले भन्नुभयो,“ नागरिकले गाउँमै सहज र सुलभरुपमा स्वास्थ्यसेवा दिने हाम्रो लक्ष्य छ। त्यही अनुरुप स्वास्थ्यसम्बन्धी विभिन्न काम गाउँपालिकाले गरिरहेको छ । ”
