बैतडीको मेलौलीमा एकै ठाउँमा चार पटक दुर्घटना,सडक स्तरोन्नती गर्न बजेट छैन

प्रदेश समाचार

Home
प्रदेश समाचार
बैतडीको मेलौलीमा एकै ठाउँमा चार पटक दुर्घटना,सडक स्तरोन्नती गर्न बजेट छैन

बैतडीको मेलौलीमा एकै ठाउँमा चार पटक दुर्घटना,सडक स्तरोन्नती गर्न बजेट छैन

बैतडी,
बैतडीको मेलौली नगरपालिका वडा नं १को जिरो पोइन्ट देखि मेलौली मन्दिरतर्फ जाने सडकमा ट्याक्टर दुर्घटना भयो । आइतबार अप्रान्ह भएको सो दुर्घटना उक्त क्षेत्रको चौथो दुर्घटना थियो । जिरो पोइन्टदेखि मन्दिरसम्म जाने उकालोबाटोमा आइतबार भएको चौथो दुर्घटना भएको वडा अध्यक्ष सरद सिंह नेगीले जानकारी दिए । यसअघि सोही ठाउँमा तीन वटा ट्याक्टर दुर्घटना भइसकेका छन् ।
ट्याक्टर सडकबाट अन्दाजी ७ मिटर तल पल्टिन पुगेको थियो ।
सडकको वरीपरी घरहरु रहेका छन् भने, उकालो समेत रहेकाले यहाँ दुर्घटनाको उच्च जोखिम हुने गरेको छ ।
सडक स्तरोन्नती हुन नसक्दा यहाँ सधै दुर्घटना भइरहने गरेको स्थानीयहरु बताउछन् । पटक पटक दुर्घटना भइरहदा पनि स्थानीय तहबाट सडक स्तरोन्नती गर्न नसकेको स्थानीयहरुको भनाइ छ ।
सडक स्तरोन्नतीको लागि आएको बजेटलाई पनि सदुपयोग गरी स्तरोन्नती हुन नसक्दा दुर्घटनाको जोखिम बढ्दो अवस्थामा रहेको स्थानीय त्रिभुवन क्षेत्रीले बताए । ‘यस क्षेत्रको सडक छेउछाउमा घरहरु छन्, दुर्घटना भएको अवस्थामा घरहरु पनि जोखिममा रहन्छन्, यसअघि यस क्षेत्रमा यस्ता दुर्घटना भएका धेरै उदाहरण छन्, सरोकारवालाको खासै चासो छैन,’ उनले भने ।
उक्त क्षेत्रमा उकालो धेरै रहेको र ओभर लोडका कारण दुर्घटना भएको वडा नं १ का वडा अध्यक्ष नेगीले बताए । ‘उकालो छ, ओभर लोड गरेर ट्याक्टरहरु जाने गर्छन्, दुर्घटनाको जोखिम छ,’ उनले भने ।
गत आर्थिक वर्षमा संघीय सरकारले उक्त सडक स्तरोन्नतीको लागि ५० लाख बजेट बिनियोजन गरेको थियो । उक्त बजेटबाट पनि सडक स्तरोन्नीको पूर्ण काम नहुदा दुर्घटनाको जोखिम कायमै छ । चालु आर्थिक वर्षमा कुनै निकायबाट बजेट आएको छैन ।
आगामी आर्थिक वर्षमा यस क्षेत्रको सडक थप स्तरोन्नतीको लागि बजेट बिनियोजन गरिने नगर प्रमुख भिम बहादुर चन्द भुकम्प बताउछन् । ‘यसक्षेत्रमा उकालो धेरै छ, ओभर लोडका कारण यहाँ दुर्घटना हुन्छ,’ नगर प्रमुख चन्द भन्छन् ।
सडकका दुवै छेउबाटा वाल निर्माणदेखि नाली व्यवस्थापनको काम गर्नसकेमा यतायात सञ्चालनमा सहज हुने स्थानीयको भनाइ छ । तर यस वर्षभने कुनै निकायबाट बजेट बिनियोजन गरिएको छैन ।