बैतडी ।
दलित समाज विकास मञ्च बैतडीको वार्षिकोत्सव तथा २१औँ स्थापना दिवस भव्य रुपले मनाइएको छ । स्थापना दिवसको अवसरमा बिहान जिल्ला अस्पतालमा फलफुल र स्वास्थ्य सामग्री वितरण गरिएको छ भने, दिउँसो अन्तरक्रिया सम्पन्न गरिएको छ ।
जिल्ला अस्पताल बैतडीका बिरामीहरुलाई फलफुल तथा जूस वितरण गरिएकोमा एकद्वार संकट व्यवस्थापन केन्द्रमा रहेका व्याक्तिहरुलाई आवस्यक पर्ने स्वास्थ्य सामग्रीहरु दिइएको मञ्चका सचीव बलभद्र दयालले बताए । उनिहरुलाई चप्पल, सरसफाईका सामान र कपडा वितरण गरिएको हो ।
यसैगरी दिउसो मञ्चको सभाहलमा अन्तरक्रिया गरिएको हो । मञ्चका अध्यक्ष सरस्वती नेपालीको अध्यक्षतामा भएको कार्यक्रमका प्रमुख अतिथी प्रमुख जिल्ला अधिकारी भिमकान्त शर्मा रहेको थिए । प्रमुख जिल्ला अधिकारी शर्माले दलित समाज विकास मञ्चले गर्दै आएको सामाजिक रुपान्तरणको अभियानमा साथ दिने बताए । उनले दलित समुदायका व्यक्तिहरुको नाम थर सच्याउने तथा उनिहरुका हकहितका बिषयमा भुमिका निर्वाह गर्ने बताए । दलित वर्गको रोजगारीको अवस्था बारे तथ्यांक अध्यावधिक गर्न मञ्चलाई सुझाव दिए ।
मञ्चका अध्यक्ष नेपालीले संस्थालाई आजका दिनसम्म सहयोग गर्ने, सयकार्य गर्ने व्यक्तिहरुलाई धन्यवाद ज्ञापन गरिन् । दलित, महिला, जेष्ठ नागरिक तथा बालबालिकाको क्षेत्रमा वकालत गर्नका लागि आगामी दिनमा सबै सरोकारवाला निकाय संग सहकार्य गर्दै आएको बताइन् । यी विषयहरुलाई सबैका साझा मुद्धाका रुपमा हेर्दै वकालतका लागि सबैले मिलेर अघि बढ्नुपर्नेका जोड दिइन् ।
कार्यक्रममा जिल्ला स्थीत सुरक्षा निकायका प्रमुख, कार्यालय प्रमुख, मानव अधिकारकर्मी लगायतका व्याक्तिहरुको सहभागीता थियो ।
