बैतडीको पाटन नगरपालिका ८ का महिलाहरु सामाजिक कार्यमा सक्रिय हुने गरेका छन्। उनीहरुले समुह गठन नै गरेर समाजमा रहेका हानिकारक प्रचलनको अन्त्यका लागि विभिन्न कार्यक्रहरु गर्दै आएका छन् ।
शनिवार समुह गठन गरेको एक बर्ष भएको अवसरमा आयोजित कार्यक्रममा लालीगुरास महिला समूहका अध्यक्ष द्रोपती ऐरले बालविवाह, लैंगिक हिसां लगायतका सामाजिक हानिकारक प्रचलनको अन्त्यका लागि कार्यक्रम गर्दै आएको बताइन् । हिंसा प्रभावित महिलाहरुका लागि मुठी दान अभियान सञ्चालन गरि लैंगिक हिंसा प्रभावित राहत कोषलाई प्रदान गरिएको समेत उनले जानकारी दिइन् ।
नगरपालिकाको वडा नम्बर ८ भित्र ११ वटा महिला समूह गठन गरिएको वडा कार्यालयले जनाएको छ । लालीगुराँस महिला समुहको पहिलो बर्ष गाँठको अवसरमा आयोजित कार्यक्रममा बोल्दै वडाअध्यक्ष हरिश बिष्टले समाज रहेका हानिकारक प्रचलनको अन्त्यका लागि महिला समुहले महत्वपुर्ण भूमिका खेलेको बताए ।
उनले वडाका तर्फबाट हुन सक्ने सहयोग गर्न आफू तयार रहेको जानकारी दिए । यस्तै कार्यक्रमका प्रमुख अतिथि एवं पाटन नगरपालिकाका नगरप्रमुख कमल सिंह बोहराले बाल विवाह, बहु विवाह, भुर्ण हत्या लगायत लैंगिक हिंसाको न्युनिकरणका लागि पालिकाले पनि विभिन्न कार्यक्रम सञ्चालन गर्दै आएको र महिला समूहले यस प्रकारका कार्यक्रम गर्दा प्रभावकारी हुने बताए ।
महिला समुह गरेको मुठी दान अभियानको उनले प्रसंसा समेत गरे । कार्यक्रममा बोल्दै नगरप्रमुख बोहराले महिला समूहलाई आवश्यक पर्ने सहयोगका लागि नगरपालिका र आफु तयार रहेको बताए ।
लालीगुराँस महिला समुहको पहिलो बर्ष गाँठको अवसरमा ६० केजी आलु, ३० केजी चामल,२० केजी गहु,५ केजी आटा र दाल जस्ता खाद्यान्न लैंगिक हिसां प्रभावित राहात कोेषलाई हस्तान्तरण गनुभएको छ ।
