व्यानल बासन्छैचरी ,काफल पाक्यो भणि।
मुइसमझ्नौ बचपनकी, तेरोडाको सुणि ।
काफलपाक्या जनम्याथली, खटालीका सेरा ।
तेरीबोली रीटीरन्छे , हृदयमा मेरा
आजभोल हुनोहैतुइत ,कोइराली बनमा ।
तोइबोल्या उदाश लाग्दो ,बैरागी मनमा ।
सधैको हौशीया हैकी, पड्डोछै दुखमा ।
तुधेकीन्छै रातदीन ,काफलका रूखमा ।
तुइहुनोछै उच्चारूख, भीटहुनीन क्यार ।
रूखैबसी काफलखान्छै ,तेरीछ बहार ।
डालीडाली काफलपाक्या, तुइडाको लाउनोछै ।
परभात्तै उठेर चरी ,बनबेत आउनोछै ।
का बसन्छै रातदीन ,बनैमा घरछकी ।
कोइतेरो दुष्मनछकी ,कसैकी डरछकी ।
काजान्छै बसन्तपछा ,कसेरी भुलन्छै ।
कोइछकी सातमातेरा ,एकलोइ डुलन्छै ।
भाग्यमानी रैछै तुइत, बनैमा रमाउछै ।
काफलपाक्या खबरदीन्छै,आशीर्वाद् कमाउछै।
केइलाउछै दुरहैडाको ,नजीक आइजामन।
तेरोइडाको नीकोमान्नौ, दुइगीत गाइजामन।
साथीसॅगी सातछनीकी, एकलोइ घुमन्छै ।
बनैमा काफलखान्छै ,बनैमा रमन्छै।
डुलन्छैकी जनम्याथली ,खटाली गाउपनी।
रमाइलाछन बनपाखा ,सुन्दरछ ठाउपनी।
नथीउर्या पेल्तलाबन, बासन्छैकी कभै ।
धेकन्छैकी इज्याबबा ,साथीसॅगी सबै।
दीनत बनैमाहुन्छै ,कासीनोछै रात।
हासीखेली डुल्लोइरएइ ,मेरा जन्म्याथात।
पानीखाएइ खटालीका,ठण्ण पानीमुल ।
डुलन्छैकी कभैतुलै, ऐश्यालुका झुल ।
बसन्त लागन्ज्याइ बठेइ ,खबर दीनोछै ।
पकृतीका काखबसी ,तुइमजा लीनोछै।
काछनतेरा इज्याबबा, एकलोइ हुन्छइकी।
इज्याबाका सम्झनाले , कभैतु रून्छइकी।
सबै खाफल जनखाएइ, मुइखीलाइ रन्दीएइ।
मेरासाथी सॅगीभीट्या ,नीकीछ भन्दिएइ।
कभैहुन्छै बनबेत ,कभैहुन्छै खोली।
काफल पाक्को काफल पाक्को, तेरीमीठी बोली।।
जानकी अवस्थी
जन्मथलो: सुर्नया ६ मुलखटाली
कर्मथलो: अजयमेरु गाउँपालिका ६ डडेल्धुरा
