बैतडी
बैतडीमा दादुरा रुबेला बिरुद्धको खोप अभियान सुरु भएको छ । देशभरीमा १३ गतेबाट यो अभियान सुरु भएपनि बैतडीमा भने बुधबारबाट खोप अभियान सुरु भएको हो ।
जिल्लाको पुर्चौडी तथा पाटन नगरपालिका, सिगास, डिलासैनी र दोगडाकेदार गाउँपालिकामा फागुन आजदेखि २१ गतेसम्म खोप अभियान संचालन हुने भएको छ । यसैगरी दशरथचन्द तथा मेलौली नगरपालिका, शिवनाथ, पन्चेश्वर र सुर्नया गाउँपालिकामा भोलीदेखि २२ गतेसम्म खोप अभियान संचालन गरिने भएको छ ।
जिल्लाको पाटन नगरपालिका ९ स्थित किचार खोप केन्द्र नजिकै रहेको सरस्वती आधारभूत विद्यालयमा बुधबार एक औपचारिक कार्यक्रमकाबीच खोप कार्यक्रमको उद्घाटन गरिएको हो ।
खोप अभियान उद्घाटन कार्यक्रममा जिल्ला समन्वय समिति प्रमुख एवं खोप समन्वय समिति सयोजक खगेन्द्र सिंह धामी, स्वास्थ्य कार्यालय बैतडीका प्रमुख योगेश प्रसाद भट्ट, वडा न ९ का कार्यबाहक वडा अध्यक्ष शंकर दत्त भट्ट, जिल्ला समन्वय समितिका सदस्य प्रेम सिंह भाट, वडा न ८ का वडा अध्यक्ष एवं पाटन नगरपालिकाका सामाजिक विकास समिति सयोजक हरिश बिष्ट, पाटन नगरपालिकाका स्वास्थ्य साखा प्रमुख मदन सिंह महरा, पाटन-९ का निवर्तमान वडा अध्यक्ष लोकेन्द्र भण्डारी लगायत अभिभावक तथा स्थानीयहरुको सहभागिता रहेको थियो ।
फागुन १३ गतेको मितिमा नियमित खोप तालिका जुधेपछि बैतडीमा बुधबारबाट मात्रै दादुरा रुबेला बिरुद्धको खोप अभियान सुरु भएको हो । जिल्लामा ९ महिनादेखि ५ वर्ष उमेरसमुहका २१ हजार ३२४ बालबालिकाहरुलाई दादुरा रुबेला बिरुद्धको खोप लगाइन लागिएको स्वास्थ्य कार्यालय बैतडीका प्रमुख योगेश प्रसाद भट्टले जानकारी दिए ।
स्थानीय तहहरुले पनि कुनै पनि लक्षित बालबालिका नछुट्न भनेर खोप अभियानलाई प्रभावकारी ढंगले सञ्चालन गरिरहेका छन् । यसअघिदेखिनै दादुरा रुबेला बिरुद्धको खोप अभियानको लागि तयारी थालेका स्थानीय तहहरुले कुनै पनि लक्षित बालबालिका खोप लगाउनबाट नछुट्ने पाटन नगरपालिकाका स्वास्थ्य साखा प्रमुख मदन सिंह महराले बताए । पहिलो चरणमा वडामा रहेका स्वास्थ्य चौकी तथा आधारभूत स्वास्थ्य केन्द्र मातहतका खोप केन्द्रहरुमा खोप लगाइने छ । खोप केन्द्रहरुमा लक्षित बालबालिकाहरुको उल्येख्य सहभागिता रहेको पाटन ९ स्थित आधारभूत स्वास्थ्य सेवा केन्द्र टकरेका प्रकाश भट्टले बताए ।
