बैतडी,
नेपाली कांग्रेस बैतडीले गाउँघर केन्द्रीत कार्यक्रम तय गरेको छ । पार्टीको केन्द्रीय कार्यक्रम अनुसार जनतासंगको भेटघाटमा पार्टी सक्रिय भएको पार्टी जिल्ला उपसभापती बीर बहादुर बिष्टले बताए ।
उनले भने, ‘अहिलेको हाम्रो अभियान आमसभा, गोष्ठी वा कुनै प्रचारप्रसार केन्द्रीत होइन । अहिले जनताको घरमा जाने सुखदुखका कुरा गर्ने, गाउँठाउँमा भएको विकास निर्माण हेर्ने, असल अभ्यासहरु हेर्ने, जन गुनासा र जन अपेक्षा अध्ययन गर्ने कांग्रेसले नेतृत्व गरेका वडाका कमजोरीहरु सच्याउन निर्देशन दिने, जनताका समस्या समाधान गर्ने, अहिले हामी केहिपनि भन्दैनौँ, जनधारणा अध्ययन गछौँ, त्यसको प्रतिवेदन तयार गरि पार्टीलाई बुझाउछौँ, त्यसैका आधारमा पार्टीको आगामी निति तथा कार्यक्रम तय हुनेछ ।’
उनले अहिले कृषक समूह, क्लवहरु, गाउँठाउँमा रहेका विभिन्न क्षेत्रमा कार्यरत समिति तथा समूहहरु संग भेटघाट गर्ने बताए ।
पार्टी जिल्ला कार्यसमितिले १६ माघ सहिद दिवसको दिन निर्णय गरि गाउँ केन्द्रीत अभियान तय गरेको पार्टी सचीव देवराज जोशीले बताए । उनले सहिद दिवसका अवसरमा एक कार्यक्रम आयोजना गर्दै गाउँ केन्द्रीत अभियानलाई अगाडी बढाउने कार्यक्रम तय गरेको बताए ।
जिल्लाका ८४ ओटै वडाका लागि कार्यक्रम तय भएको तर जिल्ला कार्यसमितिको जम्भोटोली भने १०ओटै स्थानियतहको एकएक ठाउँमा पुग्ने पार्टीका अर्का उपसभापती प्रेम बहादुर चन्दले बताए । १६ माघबाट सुरु भएको यो अभियान १० दिनपछी २६ गते टुङ्गिने उनले बताए । यस अभियानले पार्टीलाई चलायमान गराई जनअपेक्षा अनुरुपका कार्यक्रम तय गर्न सहज तुल्याउने अपेक्षा गरिएको छ ।
अभियान अन्तरगत कांग्रेस जिल्ला कार्यसमितिको टोली मंगलबार शिवनाथ गाउँपालिका पुगेको छ ।
