बैतडी ।
बैतडीको दशरथचन्द नगरपालिकाको चौथो नगरसभा सम्पन्न भएको छ । नगरसभाले विभिन्न ८ ओटा ऐन तथा कार्यविधिहरु पास गरेको छ । नगरसभाका अध्यक्ष तथा नगरप्रमुख पुष्कर राज जोशी लख्खाभाइले प्रस्तुत गरेका कार्यविधि तथा ऐनहरु सभाले पारित गरेको हो ।
उपेक्षीत उत्पीडित दलित समुदाय उत्थान तथा अधिकार ऐन २०८०, महिला संजाल सञ्चालन ऐन २०८०, मुक्त हलिया पुर्नस्थापना कार्यविधि २०८०, हलो मेयर जनगुनासो सुनुवाई (सञ्चालन तथा व्यवस्थापन) कार्यविधि २०८०, नगर बस सञ्चालन तथा व्यवस्थापन कार्यविधि २०८० पारित गरिएका छन् ।
यसैगरी टोल विकास समिति गठन तथा परिचालन सम्वन्धी निर्देशिका २०८०, नगर युवा परिषद् कार्यविधि २०७९, संसोधन २०८० र मौज्दात रकमबाट योजना निर्माण तथा विभिद कार्यक्रम सम्बन्धी प्रस्ताव पारित गरिएका हुन् ।
उल्लेखित कार्यविधिहरु पास भएपछि सम्बन्धीत बिषयका कामकाज गर्न सहज हुने मेयर जोशीले बताए । उनले नगर बस सञ्चालन गर्दा नगरबासिलाई सस्तो र सहज यात्रा गर्न सकिने भएकाले यसबर्ष बजेटको अवस्था हेरेर नगरबस सञ्चालनमा ल्याइने बताए । नगरसभा हल गढी स्थीत आइतबार आयोजीत नगरसभाको सम्बोधन गर्दै मेयर जोशीले दशरथचन्द नगरपालिका शिक्षा र स्वास्थ्य क्षेत्र सुधारको अभियान चलाएको दावी गरे ।
उनले अहिले वडा न.१ स्थीत स्वास्थ्य संस्थाबाट अनुगमन कार्य सुरुगरेको बताउदैँ समस्याहरु पहिचान गरि समाधान गर्ने बताए । शिक्षा क्षेत्रको सुधारका लागि पहल गरिरहेको र संघीय शिक्षा ऐन आएपछि थप सुधारका कामहरु गर्न सकिने बताए । मेयर जोशीले स्थानियतह भित्र शिक्षा क्षेत्रमा केहि कदम चाल्दा २०२८ सालमा बनेको शिक्षा ऐनले अवरोध गर्दै आएको बताए ।
