बैतडीको सिगास गाउँपालिका वडा नं २ को कुर्चीनेटा देखि गाउँपालिकाको केन्द्र गर्जेसम्म सडक निर्माण प्रक्रिया अघि बढाउन माग गर्दै अबरुद्ध पारिएको दुदीलाखान–गाजरी सडकखण्ड खुल्ने सहमती भएको छ । आन्दोलनरत पक्ष र सम्बन्धित निकायका प्रमुख एवं प्रतिनिबिबीच सडक सुचारु गर्ने विषयमा सहमती जुटेको हो ।
शुक्रबार इलाका प्रहरी कार्यालय पाटनमा भएको छलफलमा आन्दोलनरत पक्षका प्रतिनिधि, जिल्ला समन्वय समितिका प्रमुख खगेन्द्र सिंह धामी, प्रमुख जिल्ला अधिकारी भीमकान्त शर्मा लगायत सुरक्षा निकायका प्रमुख प्रतिनिधि, सिगास गाउँपालिकाका उपाध्यक्ष धाना धामी, सिगास–१ का वडा अध्यक्ष रामचन्द्र ऐरी, वडा नं २ का वडा अध्यक्ष ठगेन्द्र सिंह ऐर, वडा नं ६ का वडा अध्यक्ष तेज साउँद लगायत सरोकारवाला प्रतिनिधिबीच भएको छलफलबाट सडक सुचारु गर्ने सहमती भएको इलाका प्रहरी कार्यालय पाटनले जनाएको छ ।
सहमती अनुसार कुर्चीनेटादेखि गाजरीसम्म डिभिजन वन कार्यालयल लगायत सरोकारवाला निकायले अवलोकन गर्ने सहमती भएको हो ।
दुदीलाखान–कुर्चेनेटा–गर्जे सडकका विषयमा जिल्लाको सुरक्षा निकायका प्रमुख एवं प्रतिनिधि र सरोकारवला कार्यालयका प्रमुख एवं प्रतिनिधिले अनुगमन गरी ढिलोमा १५दिनभित्र गाउँपालिकालाई प्रतिबेदन पेश गर्ने विषयमा सहमती जुटेको संघर्ष समितिका संयोजक पवन चन्दले जानकारी दिए । यसैगरी गाउँपालिकाबाट सडक निर्माणको लागि बजेट बिनियोजन गर्ने विषयमा सहमती जुटेको बताइएको छ ।
वडा नं २ का वडा अध्यक्ष ठगेन्द्र सिंह ऐरले दुबै बाटोलाई प्राथमिकतामा राख्नु पर्ने र तल्लोबाटोलाई प्राथमिकता दिनुपर्ने बताए । ‘दुबै बाटो बनाउनुपर्नेमा सहमती हो, तर तल्लोबाटेलाई बढी प्राथमिकता दिनुप¥यो,’ ऐरले भने ।
वडा नम्बर १ का स्थानियहरुले पौष १६ गतेदेखी दुदिलाखान गाँजरी सडक अवरुद्ध पारेका थिए ।
