बैतडी,
बैतडीको पाटन नगरपालिका–९ गैराखानकी हिंसा प्रभावित एकल महिलालाई सहयोग गरिएको छ । शनिबार नगरपालिकाको तर्फबाट, खाद्यान्नका सामान, ओड्ने उछ्याउने लुगा कपडा, सबै प्रकारका भाडाकुडाहरु, सरसफाइका समाग्री सहयोग गरिएको हो ।
लैङ्गिक हिंसा बिरुद्धको १६ दिने अभियानका क्रममा प्रभावित महिलाहरुलाई नगरपालिकाको लैङ्गिक हिंसा राहात कोषबाट सहयोग गरिएको महिला बालबालिका साखाका प्रमुख विस्ना भण्डारीले जानकारी दिइन् । खान बस्न नै समस्या भइरहेको अवस्थामा ती महिलालाई सहयोग गरिएको उनले बताइन् ।
लैङ्गिक हिंसा बिरुद्धको १६ दिने अभियानको सुरुवात नगरपालिकाले उक्त सहयोगबाट गरेको हो । उक्त सहयोग हस्तान्त्रण कार्यक्रममा पाटन नगरपालिकाका नगर उपप्रमुख कमल सिंह बोहरा, महिला तथा बालबालिका साखाका प्रमुख बिस्ना भण्डारी, वडा नं ९ का वडा अध्यक्ष कालु सिंह भाट, महिला सुरक्षित अवास गृहका मनोपरामर्षकर्ता डम्मरी भट्ट, सामुदायिक मनोसमाजिक कार्यकर्ता संयोजक हेमन्ती खत्री, मनोसामाजिक कार्यकर्ता लक्ष्मी बिष्ट र मनोसामाजिक कार्यकर्ता भुवि बिष्ट लगायतको सहभागितामा उक्त सहयोग हस्तान्त्रण गरिएको हो ।
पाटन नगरपालिका ९ को वडा कार्यालयबाट पनि ती महिलालाई सहयोग गरिएको छ । यसअघि वडा कार्यालयबाट २० हजार रुपैया घर निर्माणको लागि प्रदान गर्ने निर्णय गरिएको वडा अध्यक्ष कालु सिंह भाटले जानकारी दिए । यसैगरी वडाबाटै १० हजार नगद सहयोग गरिएको थियो । त्यसैगरी वडा कार्यालयबाटै सहयोग गरिएको सोलार सेट पनि आज जडान गरिएको छ ।
सहयोग सामाग्री हस्तान्त्रण गर्न आएका प्रतिनिधिहरुले सरसफाई समेत गरिदिएका थिए ।
नगरपालिका र साजेदार निकाय युएनएफपिए,आइपास, सिएमसी, महिला सुरक्षित आवास गृह लगायतका निकायको साजेदारीमा महिला तथा बालबालिकाका क्षेत्रमा नगरपालिका क्षेत्रमा बिभिन्न कार्यक्रमहरु भइरहेका छन् ।
