बैतडी ।
बैतडीको पाटन नगरपालिका वडा नं ५ स्थीत त्रिपुरेश्वर माद्यमिक विद्यालयको कक्षा स्तरोन्नतीका लागि अभियान सञ्चालन गरिएको छ ।
विद्यालयमा कक्षा ११÷१२ को कक्षा सञ्चालन गर्नका लागि विद्यालयमा आयोजीत अन्तरक्रियाबाट अभियान सुरु गरिएको हो ।
अभियान अन्तरगत पाटन नगरपालिकाका मेयर गौरी सिंह रावलले २५हजार रकम सहयोग गरेकाछन् भने, वडा न.५का वडा अध्यक्ष फुनी सिंह बोहराले ७२ हजार रकम प्रदान गर्ने घोषणा गरेकाछन् । अभियानमा अरु व्यक्तिहरुले पनि आर्थिक सहयोग गरिरहेका छन् । शिक्षक तलवका लागि आर्थिक संकलन अभियान चलाउनुपर्ने बाध्यात्मक परिस्थीती रहेको वडा अध्यक्ष बोहराले बताए ।“विद्यालयसंग अहिले भवन, कक्षा कोठा, फर्निचर, पुस्तकालय, आसिटी कक्षा लगायतका संरचना प्रयाप्त छन् तर शिक्षक दरवन्दीको खाँचो छ । अहिले नगरपालिकाले मासिक १७ हजार दिने सर्तमा ३ दरवन्दी दिने कार्यविधी छ त्यसैमा दक्ष जनसक्ती पाउन मुस्कील भएकाले आर्थिक व्यवस्थापन जरुरी छ ।”
विद्यालयको स्तरोन्नतीका लागि गाउँसमाजमा रहेका समाजसेवी, बुद्धिजीवी, नागरिक समाजका प्रतिनिधिहरु र अभिभावकहरूसंग अन्तरक्रिया गरिएको विद्यालय व्यवस्थापन समिति अध्यक्ष मानसिंह ठगुन्नाले बताए । उनले भने,“हाम्रो विद्यालयमा कक्षा ११ र १२को पढाई सञ्चालन गर्न अनुमती प्राप्त भैसकेको छ । आर्थिक स्रोतको व्यवस्थापन जरुरी भएकाले अभियान सञ्चालन गरिएको हो ।”
विद्यालयले कक्षा ११ र १२मा व्यस्थापन संकाय तथा शिक्षा संकायको अध्यापन गर्ने अनुमती पाएको छ । शिक्षा संकाय तर्फ अहिलेलाई अंग्रेजी र नेपाली बिषयको पढाई हुने अभियन्ता डिबि बोहराले बताए । यसै शैक्षिक सत्रबाट उक्त पढाई सञ्चालन गरिने उनले बताए ।
“यस बिद्यालयमा अहिलेपनि ३सय बढी विद्यार्थी रहेकाछन् । कक्षा स्तरोन्नती पछि विद्यार्थी संख्या बढ्ने छ । स्तरोन्नती गर्न आर्थिक समस्या भएकाले सहयोग रकम पनि जुट्दै गएको छ । अभियान सफल भएमा बालबालिकाहरुले टाढाका स्कूल जानुपर्ने बाध्यता हट्ने छ ।”
उक्त विद्यालयमा कक्षा ११र १२को पढाई सञ्चालन भएमा दैनिक ३देखी ५ घण्टा सम्म पैदल यात्रा गरेर अन्यत्र जानुपर्ने बाध्यता हट्ने छ । नजिक विद्यालय नहुँदा विद्यार्थीहरु अप्ठ्यारो बाटोको प्रयोग गरि दुर्गास्थान, पाटन तथा गुरुखोला जानुपर्ने बाध्यता रहेको छ । केहि विद्यार्थीले विद्यालय टाढा हुदाँ पढाई छाड्नुपर्ने बाध्यता समेत छ ।
