बैतडी।
बैतडीको शिवनाथ गाउँपालिकाले पालिका भित्रै अगरवत्ती उत्पादन गर्न थालेको छ ।
पालिका भित्रका २५जना उद्यमीहरुलाई तालिम प्रदान गरि “शिवनाथ दर्शन” नामको अगरवत्ती उत्पादन सुरु गरिएको हो ।
अहिले परिक्षणका लागि अगरवत्ती उत्पादन गरिएको र आगामी दिनमा विक्रिका लागि उत्पादन गरिने गाउँपालिकाका उद्योग विकास साखा प्रमुख भुपेन्द्र पाण्डेयले बताए । गाउँघरमै उत्पादीत अगरवत्ति गुणस्तरीय र आयातित अगरवत्ति भन्दा सस्तोमा विक्रि गर्न सकिने उनले बताए ।
‘बजारमा पाइने आयातीत अगरवत्तिको १चौथाई मुल्यमै स्थानिय अगरवत्ती उत्पादन गरेर विक्रि गर्न सकिने छ । अगरवत्ति उत्पादन गर्नका लागि कोइला, सल्लाको फल, गिठि वा काउलो, भिमल र बाँस वा निङ्गालोका सिन्का, सूपर तेल तथा बास्ना आवश्यक पर्छ । सबैजसो कच्चा पदार्थ स्थानिय स्तरमै उपलब्ध भएकाले यो व्यवसाय गर्न सजिलो र आम्दानी गर्न सकिने हुन्छ ।,’ उनले भने ।
उक्त तालिम उद्योग विकास शाखाको १लाख ५०हजारमा सञ्चालन गरिएको पाण्डेयले बताए ।
अहिले गाउँपालिकाले पालिका भित्रका १ सय २० जनालाई उद्यमशिलताको तालिम प्रदान गरि उद्यमी बनाएको जनाएको छ । तालिम दिएका मध्ये दालमोट र अगरवत्ती उत्पादन गर्ने उद्यमीहरु सफल हुन थालेको गाउँपालिकाका प्रमुख प्रशासकीय अधिकृत नरेन्द्र महताले बताए ।
अगरवत्ती उत्पादनको तालिमा पाएसंगै व्यवसाय सञ्चालन गर्ने वडा न.२का उद्यमी अहिल्या ठकुराठी ले बताइन् । व्यवसायीक रुपमा काम गर्नका लागि पालिका वा अन्य निकायबाट सहयोग भएमा सहज हुने उनको भनाई छ ।
अहिले सम्म कतैबाट तालिम नपाएकोमा अब तालिम पाउदाँ व्यवसाय गर्ने जाँगर बढेको वडा न. ५ का उद्यमी पशुपती साउँदले बताइन् ।
गाउँमा विद्युत आएपछी अगरवत्ती उद्योग फष्टाउन सकिने उद्यमी प्रकाश साउदले बताए । कच्चा पर्दाथलाई धुलो पार्र्ने मेसिन विद्युतबाट चल्ने भएकाले विद्युतिकरणपछी व्यवसाय फस्टाउने उनको भनाई ।
गाउँघरमै फुर्सदको समयमा उद्यम गर्न चाहने व्यक्तिहरुलाई तालिम दिएर अगरवत्ती उत्पादन पेषामा आवद्ध गराउन खोजेको शिवनाथ गाउँपालिका अध्यक्ष कर्णसिंह साउँदले बताए ।
कम लगानीमै अगरवत्ति उत्पादन गर्न सकिने र कच्चा पर्दाथ स्थानिय स्तरमै पाइने भएकाले अगरवत्ति निर्माणमा आवद्ध गराउने उदेश्य रहेको उनको भनाई छ । शिवनाथ गाउँपालिकाले पालिका भित्रका अन्य ८०जना उद्यमीलाई सिप स्तरोन्नतीको तालिम समेत प्रदान गरेको छ ।
