बैतडी।
बैतडीको मेलौली नगरपालिकाले विद्यार्थीहरुलाई असल संस्कार सिकाउनका लागि पाठ्यक्रम निर्माण गर्ने भएको छ । मंगलबार नगरपालिकाभित्रका सबै प्रधानाध्यापकहरुलाई बोलाएर उक्त निर्णय गरिएको हो ।
आगामी आर्थिक बर्षमा कक्षा ४देखी ८ सम्मका लागि विद्यार्थीहरुलाई सांस्कारीक ज्ञान दिने पाठ्यक्रम बनाउने नगरपालिकाका प्रमुख प्रशासकीय अधिकृत भिम बहादुर चन्द (भुकम्प) ले बताए ।
‘अहिले विद्यार्थीहरुले शिक्षक प्रति आदर भाव राख्न छाडीसकेका छन् । शिक्षकलाई भेट्दा नमस्कार गर्ने प्रवृत्ति नै हराएको छ । म मेयर हुँ, बाटोमा विद्यार्थीहरु मलाई नै जिस्क्याउछन् । बालबालिकाहरु आफन्तलाई समेत नमस्कार गर्न भुलेका छन् । पाठ्यक्रम मार्फत विद्यार्थीहरुलाई नैतिकवान बनाउन जरुरी छ, त्यस प्रकारको पाठ्यक्रम निर्माण गर्नेछौँ ।,’ उनले भने ।
नगर प्रमुख चन्दले आगामी बर्षदेखी कक्षा ८ को परिक्षा नगर स्तरीय गरिने बताए । नगर स्तरीय परिक्षा सञ्चालनका लागि समिति गठन गरि पेपर निर्माण गर्ने र अन्तर विद्यालय परिक्षा गर्ने नगरपालिकाले जनाएको छ । विद्यालयका समस्याहरु लिखित रुपमा पेश गर्न प्रधानाध्यापकहरुलाई उनको आग्रह छ ।
आगामी आर्थिक बर्षलाई शैक्षिक सुधार बर्ष घोषणा गर्ने मेलौली नगरपालिकाले जनाएको छ । अन्य क्षेत्र भन्दा शिक्षा क्षेत्रमा बढी लगानी गर्न तयार रहेको कार्यपालिका सदस्यहरुको प्रतिवद्धता छ । शिक्षामा गरिएको लगानीको परिणाम ढिलो प्राप्त हुने भएपनी लगानीको जरुरत भएको वडा न.८का अध्यक्ष तपेन्द्र बिष्टले बताए । उनले शिक्षको क्षमता वृद्धि तथा अविभावक शिक्षाका लागि समेत बजेटको आवस्यकता भएको बताए । वडा न.२का अध्यक्ष कृष्णदत्त भट्टले शिक्षा क्षेत्रमा गरेको लगानी समाज परिवर्तनमा खर्च भएको मान्नुपर्ने बताए । उनले शिक्षा विकासको मुख्य आधार भएको भन्दै युवालाई उद्यमशील बनाउने शिक्षाको समेत जरुरत रहेको बताए ।
मेलौली नगरपालिकाले शिक्षक, विद्यार्थी, अविभावक र विद्यालय व्यवस्थापन समितिका अध्यक्षहरु संग विस्तृत छलफल गरेर मात्रै शिक्षा क्षेत्रका योजना तय गर्ने जनाएको छ ।
योजना बनाउनुपुर्व सबै संग छलफलको आवश्यकता रहेको भन्दै सरोकारवालाहरु संग छुट्टाछुट्टै अन्तरक्रिया कार्यक्रम आयोजना गरिरहेको नगरपालिकाका प्रमुख प्रशासकीय अधिकृत सपना कार्की ले बताए ।
