बैतडी ।
बैतडीको डिलाशैनी गाउँपालिका–२ धौँकुचेमा सुरेश भकत बोहराको परिवार एक सानो पसल व्यवसाय सञ्चालन गरेर बसेको छ ।
उक्त व्यवसाय गरेका सुरेश भकत अहिले ३८ बर्षका भए । १४ बर्षको उमेर देखी व्यसायमा जोडिएका भकतले अहिलेसम्म सबै प्रकारका पशुपन्छी पालन गरिसकेकाछन् ।
उनले बाख्र्रा, भैसी, गोरु, घोडा, सुगुर, कुकुर, खरायो, कुखुरा, कालिज, हाँस, टर्की, च्याखुरा, मौरी लगायत यस क्षेत्रमा पालिने सबै पशुपन्छी व्यवसायीक रुपमा पालन गरेपनी कुनैमा सफल हुन सकेनन् । तर उनले विगत १५ बर्ष यता सञ्चालन गरेको कुकुर पालनले भने उनलाई निरन्तर आम्दानी दिइरहेको छ ।
उनले भने,‘स्थानिय बजार धान्ने गरेर ठिकै मात्रामा व्यवसाय सञ्चालन गरेको हुँ कुनैपनी पशुपन्छी व्यवसायमा सफलता प्राप्त गर्न सकेन, मैले जिवनमा नगरेको काम सायदै होला तर कुकुर पालनमा भने म सफल भएजस्तो लाग्छ । मैले पालेका कुकुर मेरै परिवारका सदस्य हुन जस्तो लाग्छ ।’
पशु पालनमा सफलता प्राप्त गर्न नसकेका भकलते अहिले आफ्नी छोरी लक्ष्मीलाई पशु विज्ञान बिषय पढाइरहेका छन् ।
उनले पालन गरेको बेलायती कुकुरको छाउरा ८ हजार बढी रकममा विक्रि हुन्छ । उक्त छाउरा विक्रि गरेर मात्रै बार्षिक ८० हजार रकम सम्म आर्जन गर्दछन् । उनले कुकुरका माउ भारतको पिथौरागडबाट ल्याएको सुनाए । उनले पालेका कुकुरले बर्षमा २पटक बच्चा पाउने गरेको छ ।
उनले पशुपन्छी पालन मात्रै नभएर सबै प्रकारको व्यापार समेत गरेको सुनाए । विगतमा रेडियो, टिभि, टेप रेर्कडर विक्रि मर्मत व्यवसाय, होटल व्यवसाय र अन्य उपभोग्य बस्तुको व्यपार समेत गरे तर व्यवसायमा समेत खासै सफलता प्राप्त नगरेपछी अहिले अटो चलाउन थालेकाछन् । आधा रकम ऋण निकालेर ६ हजार ५०हजारमा अटो खरिद गरेका भकत अटो व्यवसाय बाटै दैनिक जिवनयापन गर्छन् ।
भकतले १५बर्षको उमेरमा १४बर्षकी अमिता बोहरासंग बाल बिवाह भएको सुनाए । भकतको व्यवसायमा अमिताले साथ दिदैँ आएकी छन् । उनकै सक्रियतामा भकतले २ ठाउँमा करिव २० रोपनी जमिन खरिद गरेका छन् ।
कलाकारीता क्षेत्रमा समेत सक्रिय रहेका भकत मेला महोत्सवहरुमा नाटक देखाउने तथा बेलाबेलामा घरैमा मान्छेहरु जम्मा गरेर बाध्यबादनका साधन बजाउदैँ गीत संगीतमा व्यस्त हुन्छन् ।
