गणतन्त्र तमईखी आयाे, गरिबकी गु तन्त्र
राजा धपाई राजाई बन्न्या, रैछ तम्राे मन्त्र
साेजा जन्ता तम्राई पाछा, लाग्या बिस्वास माणी
गुका नजिक गनै औन्छे, क्याद्या आब जाणी
एक् राजाका हजार राजा, हन् बाँकी छ नन्न
गरिब जन्ता साेसिखायाकाे, कि पचलाे अन्न
कराैडाैकी गाडी तम्री, बिन कामैकाे भत्ता
चेलाचेली कैमुल्क छन, केई नाईथिन पत्ता
काेई रैछाै भारता खामा, काेई रैछाै चाईनाका
पुई क्याकाे विकाश गच्छाै, भया: दुई साईनाका
कुर्चिकी पडाैसिका गाेडाई, सलाम गद्ध पस्या
गणतन्त्रकाे नारा आब, लाैन्या हाैब कस्या
पडाैसी कै मुल्क पुग्या, तम्खाइ ठाैर: हग्वा
गाेर्खालिनकी बदी गरया, भण्णान सबै डग्वा
याेजनामा कमिसन् छ, अनुदान झाेल्यान्लाई
सत्ता नती कस्याँ रलाे, बिसर्या डाेल्यान्लाई
बुडा नेता देश चलाैन्या, बाला जती खाडी
जन्ताका अदिन्न आया, क्याद्या कठै लाडी
बुडाे भत्ता खन्या उमर, तम्की काँ हरायाे
मद्याबेला मन्त्री बन्न्या, नियम काँहै आयाे
कर्मचारी रिटाईर हन्या, साटी भया पन
तम् नहन्या असीमालै, तब् दुखन्छ मन
नदीनाला बेचि खाया, उद्याेग गरया बन्द
कब: सम्म फैलाउन्या हाै, याे ईसी दुर्घन्ध
बनबासा साटीकी चिनी, नेपाल: साैमाछ
कस्याँ खन्या भण्ण्या चिन्ता, सबैकी माैमाछ
मुल्क भराे कर बडाया, तमुईलाई पाल्लाकी
दु:ख् गद्धईछ हम्ले तम्रा, ढाडैनी हाल्लाकी
गरिबाे खुन चुसी खनाई, नाई माण्णा सरम
जन्ता गरिब नेता धनी, गणतन्त्राे धरम
विकसित देशा: राष्ट्रप्रमुख, कती निका छन
तम्री जानी जन्ता लुटी, नाई कमाैना धन
क्षमता रे प्रतिभाकाे , नाईथी कदर कती
नैपाल: खड्डामा भायाै, अती हाेईग्याे अती
नपड्या:लै नेता हन्या, पड्डयाकी लाेक सेवा
वाँइमा आँजी कार्यकर्ता, खपाैनाई ठाेक सेवा
साेल पडी दुई पडया::की, भिक माग्दु बनाया
नाक: बुजाे हाल्लई पडयाे, सुदाेईकी गनाया
अईलका गणतन्त्रया नेता, उई बेलाका राणा
सम्वैधानिक अङ्ग भया,कमाई खान्या भाणा
चेलाचेली भाई भतिजा, ठाै ठाैमा खपाैन्या
काम गद्यारया साेजा मान्स:, डाँण् लगाई धपाैन्या
नेता भण्या काेकाई हन्छे, भण्णान सबै मान्स
ईसेरी गन् फाेड्डाई रया, कति दिन्ना चान्स
पदमा पुग्या आफ्नाेई जाण्ण, भण्याे क्याई माणला
चाैरासीलाई औन्त दिय, पुई थाेक्काई जाणला
कानुन सबै तम्रा हात:, जज्या चाईयाे जसाे
तबैत देशकाे कानुन, लागन्छ अनकसाे
सईलाई सईहाे भण्या, जेलमा काेचन्छाै
गरिब् लाईत पिँजडाका, स्वा जसा साेचन्छाै
याे माटी सत्यकी भया, हाेईझाली अप्ताली
देउतालै बुज्जाईन मर्म, बाेल्ल हम्ले खाली
सत्य सबै हराई गयाे, कलिकाल औनाले
भया भरा: दु:ख्ख पडया, तम आघा लाैनाले
पाँच वर्षकी जित्याका हाै, गद्धाई राै मनपडी
मेट्ला पख: चाैरासीमा, तमरी रखडी
