बैतडी : बैतडीमा सातौँ राष्ट्रिय कृषि गणनाअन्तर्गत जिल्लाका १ सय ४४ क्षेत्रमा कृषि गणना गरिने भएको छ। जिल्लामा १० स्थानीय तहमा रहेका ८४ वटै वडाका १ सय ४४ क्षेत्रमा गणना गरिने भएको जिल्ला कृषि गणनाका कार्यालयका प्रमुख सुरेन्द्रप्रसाद पन्तले बताए।
कार्यालय प्रमुख पन्तका अनुसार सबैभन्दा बढी डिलाशैनी गाउँपालिकाका १७ स्थानमा कृषि गणना गरिने भएको छ। दोगडाकेदार गाउँपालिका, पुचौडी, दशरथचन्द, पाटन नगरपालिकाका १६, मेलौली नगरपालिका र सिगास गाउँपालिकाका १५, सुर्नया, पञ्चेश्वर गाउँपालिकाका १२ र शिवनाथ गाउँपालिकाका ९ स्थानमा गणना कार्य हुने जनाइएको छ।
नेपालमा ०१८ सालदेखि प्रत्येक १० वर्षमा कृषि गणना हुँदै आएको छ। गणनाका लागि बैतडीमा १२ सुपरीवेक्षक र ५० गणक गरेर ६२ जनाको जनशक्ति खटाइने जनाइएको छ। जनशक्तिलाई चैत २४ सम्म करारमा नियुक्त गरिसक्ने र चैत २५ गतेबाट तालिम दिइनेछ। तालिम वैशाख ३ सम्म सञ्चालन हुनेछ। तालिमपश्चात ४५ दिनसम्म हुने मूल गणना वैशाख ६ गते जेठ १९ सम्म हुने कार्यालय प्रमुख पन्तले बताए।
गणनाका क्रममा कृषकले भोगचलन गरेको जग्गाको आकार, जग्गाको उपभोग र उपयोग, बाली लागेको जग्गाको क्षेत्रफल, मुख्य बालीको उत्पादन र सिँचाइको विवरण लिइनेछ। कृषि सामग्री र औजारको उपयोग, पशुपन्छीको सङ्ख्या, आहारसम्बन्धी विवरण, कृषिमा संलग्न जनशक्ति, लिङ्गका आधारमा कृषि जग्गाको स्वामित्वको अवस्थाबारे गणकले तथ्याङ्क सङ्कलन गर्नेछन्।
कृषि वन, कृषि ऋण, बीमा अनुदान, कृषि कार्यमा जलवायु परिवर्तनका प्रभाव, हरितगृह पद्धतिको प्रयोग, माटो परीक्षण, कृषि बजारसम्मको पहुँच, कृषि अवशेष र फोहोरको व्यवस्थापनजस्ता विषयमा तथ्याङ्क सङ्कलन गरिने कार्यालयले जनाएको छ। बैतडीमा चैत १ गते जिल्ला सदरमुकाममा जिल्ला कृषि गणना कार्यालयको स्थापना गरेर काम शुरु भएको हो।
