धनगढी । बैतडीमा मदिरा नखुवाएको निहुँमा वडा सचिवका छोराको समूहले युवकमाथि कुटपिट गरेको आरोप लागेको छ । जिल्लाको डिलासैनी गाउँपालिका–५ का ३१ वर्षीय धनन्जय नाथलाई स्थानीय उमेश धामीको समूहले महाअष्टमीका दिन कफलासैनी मन्दिरबहमा मेला हेरेर घर फर्किने बेला कुटपिट गरेको पीडित पक्षले जनाएको छ ।
धनगढीस्थित निसर्ग अस्पतालमा उपचाररत नाथकी श्रीमती जानकीले धामीसहित वडा नम्बर ५ कै अम्बि लुहार र कमल लुहार लगायतले मेला हेरेर घर फर्किने क्रममा श्रीमानमाथि कुटपिट गरेको बताइन् । उनकाअनुसार नाथले एक महिना अघि सोही वडाका सचिव समेत रहेका धामीका बुवा भानसिंह धामीको घरबाट दुहुँनो गाई १४ हजारमा खरिद गरेर ल्याएका थिए ।
गाईले दुध नदिएपछि सचिवकै आग्रहमा फिर्ता गरिएको थियो तर गाई फिर्ता गर्न गएकै दिन उमेश धामीसँग बीच बाटोमा भेट भएपछि मदिरा खुवाउन आग्रह गरेका थिए । पैँसा नभएको भन्दै मदिरा नखुवाएको झोकमा मेलाबाट फर्किने बेला उनीमाथि कुटपिट गरेको जानकी बताउँछिन् ।
‘उहाँहरुबीच पूर्व रिसीइबी केही पनि थिएन । गाई फिर्ता गरेको दिन मेरो श्रीमानलाई मदिरा खुवाउन आग्रह गरेका रहेछन् । पैँसा नभएर खुवाउन सकेन,’ जानकीले भनिन्, ‘त्यही कुरालाई लिएर मेलाका दिन उहाँमाथि कुटपिट गरियो । बाटोमा बेहोस भेटेपछि अस्पताल ल्याएका हौँ ।’
बेहोस अवस्थामा भेटिएका नाथको निसर्ग अस्पतालमा उपचारपछि होस् खुलेपछि उनैले घटनाबारे बताएका थिए । होस आएपनि नाथको तल्लो शरीर चलिरहेको छैन भने राम्रोसँग बोल्न सक्ने अवस्थामा पनि छैनन् । प्रहरीले कुटपिट गरेको आरोप धामीसहित अम्बि र कमल लुहारलाई पक्राउ गरेको थियो तर राजनीतिक चलखेल गरेका छाडिएको आरोप लगाइएको छ ।
‘उहाँहरुलाई पक्राउ गरिएको थियो तर घटनामा संलग्न नभएको भन्दै इलाका प्रहरी कार्यालय पाटनले छाडिदिएको छ,’ जानकीले भनिन्, ‘आर्थिक अभावमा श्रीमानको उपचार गराउन सक्ने अवस्था पनि छैन । दोषीलाई कारवाहीको दायरामा ल्याउन माग गर्दछु ।’ नाथ दम्पत्तीका दुई जना छोराछोरी छन् ।
यता इलाका प्रहरी कार्यालय पाटनले भने पीडित पक्षले घटनाको अनुसन्धानका लागि प्रहरी चौकी गोकुलेश्वरमा निवेदन दिएपछि सोधपुछका लागि तीनै जनालाई बोलाइएको जनाएको छ । तर संलग्न भएको प्रारम्भीक प्रमाण नभेटिएकाले बोलाएको बेला उपस्थित हुने गरी छाडिएको छ ।
‘पीडित पक्षले दिएको निवेदनका आधारमा आरोपीतलाई सोधपुछका लागि उनीहरुलाई बोलाएका थियौँ,’ इप्रका पाटनका प्रहरी निरीक्षक कमल चौधरीले भने, ‘बोलाएका बखत आउनेगरी छाडिएको हो । हामी घटनाको अनुसन्धान गरिरहेका छौँ ।’
